Friday, May 22, 2009

هم النم يا طمطم






بعد ما كنت قررت أتكلم في المدونة دي على الأمومة بصفتها تجربة إنسانية، حسيت إن الموضوع ممكن يكون أكثر تعقيدا من ده.. وإن على قد ما أنا نفسي أتكلم عن تميم وعن مراحل نموه وعن مشاعري ناحيته، على قد ما أنا حابه –كمان- أنقل خبرتي المتواضعة في التعامل مع احتياجاته..سواء النفسية أو الجسمانية، ونفسي فعلا أكتب حاجة الامهات الجداد يستفيدوا منها ويشاركوني آراءهم..والأمهات القدام كمان (قال يعني أنا قدمت!) يحكولنا خبراتهم.. يعني لو تسمحولي نخلي المدونة دي فسحة نتبادل فيها الآراء والخبرات..

أول حاجة جت على بالي هي إطعام الرضيع.. ودي كانت مشكلة كبيرة عندي شخصيا وسببت لي أزمات كتير.. من الناحية الأولى، كل الامهات وخاصة الأجيال الأكبر مننا بيشوفوا إن اللي عملوه معانا هو الصح وعين العقل ومفيش أحسن من كده! في حين إن بعض من أفكارهم الغذائية المدمرة ممكن تكون غلط جدا وتسبب مشاكل في الهضم..

ومن ناحية تانية بتلاقي إن أصابع اتهام كتيرة موجهه ليكي (سواء قررتي تأكلي طفلك بدري أو متأخر) وبتلاقي الامهات اللي بتختلف معاكي بيكون عندها نوع من التعالي العجيب كأنهم فازوا عليكي في مسابقة أحسن أم و"ياااي إنتي بتأكلي ابنك زبادي أنا بأكل ابني كريم كراميل!!".. مع العلم بأن الأمومة مش مجال للمنافسة أساسا! ولا مجال للتباهي! كل طفل له طبيعته واحتياجاته، وكل أم بتكون أكتر واحدة قادرة تلبي احتياجات طفلها..

أنا مثلا قبل الولادة، كنت مقررة لتميم إنه يرضع طبيعي (وبدون أي مكملات غذائية) لمدة 6 شهور.. لأن الدراسات العلمية الحديثة بتقول الكلام ده والدكاترة كمان.. لكن عند سن 4 شهور لقيت إني تقريبا طول الـ24 ساعة مش باعمل حاجة غير رضاعة وتميم كمان شكله مش شبعان.. وعشان كده قررت أدخل الأكل الصلب.. سألت الدكتور وقرأت في كتب ومواقع عن نوعيات الأكل اللي ممكن أقدمها لتميم وقد كان..

لما تميم كمل 4 شهور بدأت له مع الزبادي.. معلقة صغيرة وبدأت معاه بالتدريج الممل.. معدة الأطفال بتكون صغيرة جدا ومش بتستوعب غير كميات قليلة.. ده طبعا ما يمنعش إني في المرة الأولى لما لقيته بياكل وسعيد بالزبادي ادت له 4 معالق فما كان منه إلا إنه رجعهوملي بمجرد ما خلص الأكل.. وده الجدول اللي مشيت عليه زي ما قال الدكتور وزي ما قالت الكتب..

جدول إطعام الأطفال..
من 4-5 شهور: زبادي + سيريلاك (اختاري النوع اللي بيحتاج مياة فقط ولو اختارتي النوع اللي بيحتاج لبن بيقى تضيفي لبن صناعي للأطفال مش اللبن العادي بتاعنا بتاتا) وكمان زودي كمية المياه في الأول وبعدها زودي الكثافة بالتدريج (الارشادات على العبوة) + شوفان (اللي هو كويكر) مسلوق في مياه

من 6-8 : إضافة موز مهروس + تفاح مهروس + خوخ مهروس + أفوكادو (موجود في مصر بس غالي شوية) + كوسة مهروسة + جزر مسلوق ومهروس

· ضيفي نوع فاكهة أو خضار واحد كل مره ولاحظي عملية الهضم والاخراج وكمان خلي بالك لإن فيه أنواع خضار ممكن تسبب حساسية لبعض الأطفال.

من 8-10: إضافة جبنة نستو + صفار بيض + فراخ (تضرب مع الطعام في الخلاط لسهولة البلع في الأول) + سمك (مسلوق أو مشوي وطبعا فيليه) + بروكلي (يتسلق في مياه بتغلي لفترة صغيرة والغطا مقفول بعدها يصدم في حمام ماء بالثلج)

من 10-12: إضافة خبز (من الأفضل البداية بالخبز المصنوع من القمح الأسمر (البلدي أو التوست البني)) + لحوم حمراء + مكرونة (مسلوقة وممكن تضيفي عليها خضار بيوريه كأنه صوص)

ملحوظات هامة:
في السنة الأولى ممنوع الملح: لإنه بيزود احتمالية إصابة الأطفال بضغط الدم لما يكبروا
في السنة الأولى ممنوع السكر: ممنوع استخدام السكر العادي (بتاع الشاي) مع الرضع لإنه بيعمل غازات ومشاكل ولو محتاجة تحلي حاجة ضروري يفضل استخدام عسل النحل الصافي وبكميات قليلة جدا.
في السنة الأولى ممنوع الألبان: اللبن البقري بأشكاله (كامل دسم – نص دسم – ربع دسم!)

فكرة :
الحاجة اللي كانت ومازالت بتسعفني دلوقت هي إني أطبخ لينا ولتميم مقدما.. يعني أكل تميم باعمل منه كمية وأشيل في الفريزر.. وكمان ممكن أطبخ لينا لما يكون تميم نايم لإنه لما بيصحي –وأعتقد إن كل الأمهات عارفة- مش باعرف أعمل منه حاجة! :)
--

12 comments:

محمد عبد الغفار said...

نصائح الأقدمين اقرب ما يكون لقصه جحا وحماره

اما خبرتك فهى مفيده حقاً ولكن سيأتى بعدك من يعتبرها جحا وحماره

الست فرويد said...

هو انا صحيح مش ماما
بس هاتابعك علشان اتعلم باعتبر ما سيكون باذن الله

بس الحق بقى انا هاتابعك علشان بحبك

ايه اخبار الفراشة الحمراء :)

تحياتى

Ghada said...

محمد:
تقريبا إنت مافهمتنيش.. أنا باعتمد على كلام علمي مش من تأليفي وأعتقد إن ده مالوش علاقة خالص بموضوع جحا والحمار
:))
الست فرويد:
أنا سعيدة جدا بوجودك ومتابعتك

والفراشة الحمرا يا ستي بتسلم عليكي وبتقول لك إنها عاملة شغل كويس معايا
:)))

ياسمين زيدان said...

غادة ازيك؟
شكرا عالمعلومات اللى اكيد هتفيد ان شاء الله..انا دلوقتى فى الشهر التاسع من الحمل و مرعوووووبة بمعنى الكلمة من الولادة ربنا يستر :S
انا حاسة ان الموضوع كبير
بالمناسبة عندك اقتراحات لأسامى بنات؟

Yasmine Adel Fouad said...

انا مش ام و لسه حتى مبقيتش مدام بس هتابعك عشان ف يوم هنحتاج الكلام ده

بشكل ما بحب طريقة تواصل الاجيال الجديدة عن الكبار و لو ان الكبار عندهم خبره بحسها عملاقة يعنى بيشخصوا الامراض بشكل مبهر و يحددوا العلاج من غير ادوية من خلال اكل او طريقة نوم او تنظيم مواعيد و كده

لا خاب من استشار

corbina said...

فعلا فى ناس بتعتبر نفسها فى مسابقة
و ازاى بتأكليها زبادى ؟
و ازاى سيريلاك
هيرو احسن
و ازاى مياة نستلة بركة احسن و هك>ا

هو احسن حاجة اللى الدكتونر يقوله
و هو بيديك اختيارات
و طبعا كل طفل غير التانى
انا بنتى بتكره البطاطس و تعشق الزبادى

فى غيرها يحب البطاطس و يكره الجبنة النستو

مش معنى كده ان انا ام وحشة او مش بفهم
هى اختياجاتهاكده و رغباتها كده

و طبعا انسى انك تطبخى ولا حتى تعرفى تغسلى وشك و ابنك صاحى
لان على ما تغسلى وشك
هيكون دمر البيت

www.tadwina.com said...

مرحباً
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/606

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،

فريق عمل تدوينة دوت كوم.
http://www.tadwina.com

Heba Abdel Aleem said...

متشكرة يا غادة على النصايح

و ادعى لى اجربها قريب

***

ربنا يبارك لك فى تميم

مَلَكة said...

ده انتي مالكيش حل يابنتي والله
انا اساسا لسة مش حامل ولكن طول الوقت بقعد افكر بأنهي منطق ممكن اعرف اربي اطفال وانا معنديش ريحة الخبرة في الحكاية دي ولا كان عندي اخوات ولا حتى قرايب عندهم اطفال
ميييييييييح
بس الحمد لله هتنقذينا انتي وتميم ربنا يخليكم لبعض ويخليكي لينا :)

اقصوصه said...

رمضان كريم

وكل عام وانتم بخير :)

Anonymous said...

السلام عليكم
قمت مع مجموعة من الأصدقاء بإنشاء عدد من المدونات ، ووضعنا بها إعلانات جوجل أدسنس، وبالفعل نحقق دخلا مش بطال
فعلى جميع الأخوة الكرام سواء عنده مدونة أو لم ينشئ مدونة بعد، وكانت له رغبة في الاشتراك معنا في هذا العمل، برجاء مراسلتي على الإيميل niletrader@gmail.com
والله الموضوع مثمر، وبالفعل وصلتنا دولارات من أدسنس ، فالموضوع ليس وهمًا
برجاء نشر هذا الموضوع لتعم الفائدة
مع تحياتي
Hello
We are a group of Egyptian guys who established some blogs where we added Google Adsense codes so we make some money on monthly basis, as a way of coming over our financial problems!!
if you would like to help us through allowing us adding the Adsense code to your blog and share the profits with you, pls contact us niletrader@gmail.com
Yours
Ash

Unknown said...

thx

كشف تسربات المياة
غسيل خزانات
شركة نظافة عامة