هم النم يا طمطم

بعد ما كنت قررت أتكلم في المدونة دي على الأمومة بصفتها تجربة إنسانية، حسيت إن الموضوع ممكن يكون أكثر تعقيدا من ده.. وإن على قد ما أنا نفسي أتكلم عن تميم وعن مراحل نموه وعن مشاعري ناحيته، على قد ما أنا حابه –كمان- أنقل خبرتي المتواضعة في التعامل مع احتياجاته..سواء النفسية أو الجسمانية، ونفسي فعلا أكتب حاجة الامهات الجداد يستفيدوا منها ويشاركوني آراءهم..والأمهات القدام كمان (قال يعني أنا قدمت!) يحكولنا خبراتهم.. يعني لو تسمحولي نخلي المدونة دي فسحة نتبادل فيها الآراء والخبرات..

أول حاجة جت على بالي هي إطعام الرضيع.. ودي كانت مشكلة كبيرة عندي شخصيا وسببت لي أزمات كتير.. من الناحية الأولى، كل الامهات وخاصة الأجيال الأكبر مننا بيشوفوا إن اللي عملوه معانا هو الصح وعين العقل ومفيش أحسن من كده! في حين إن بعض من أفكارهم الغذائية المدمرة ممكن تكون غلط جدا وتسبب مشاكل في الهضم..

ومن ناحية تانية بتلاقي إن أصابع اتهام كتيرة موجهه ليكي (سواء قررتي تأكلي طفلك بدري أو متأخر) وبتلاقي الامهات اللي بتختلف معاكي بيكون عندها نوع من التعالي العجيب كأنهم فازوا عليكي في مسابقة أحسن أم و"ياااي إنتي بتأكلي ابنك زبادي أنا بأكل ابني كريم كراميل!!".. مع العلم بأن الأمومة مش مجال للمنافسة أساسا! ولا مجال للتباهي! كل طفل له طبيعته واحتياجاته، وكل أم بتكون أكتر واحدة قادرة تلبي احتياجات طفلها..

أنا مثلا قبل الولادة، كنت مقررة لتميم إنه يرضع طبيعي (وبدون أي مكملات غذائية) لمدة 6 شهور.. لأن الدراسات العلمية الحديثة بتقول الكلام ده والدكاترة كمان.. لكن عند سن 4 شهور لقيت إني تقريبا طول الـ24 ساعة مش باعمل حاجة غير رضاعة وتميم كمان شكله مش شبعان.. وعشان كده قررت أدخل الأكل الصلب.. سألت الدكتور وقرأت في كتب ومواقع عن نوعيات الأكل اللي ممكن أقدمها لتميم وقد كان..

لما تميم كمل 4 شهور بدأت له مع الزبادي.. معلقة صغيرة وبدأت معاه بالتدريج الممل.. معدة الأطفال بتكون صغيرة جدا ومش بتستوعب غير كميات قليلة.. ده طبعا ما يمنعش إني في المرة الأولى لما لقيته بياكل وسعيد بالزبادي ادت له 4 معالق فما كان منه إلا إنه رجعهوملي بمجرد ما خلص الأكل.. وده الجدول اللي مشيت عليه زي ما قال الدكتور وزي ما قالت الكتب..

جدول إطعام الأطفال..
من 4-5 شهور: زبادي + سيريلاك (اختاري النوع اللي بيحتاج مياة فقط ولو اختارتي النوع اللي بيحتاج لبن بيقى تضيفي لبن صناعي للأطفال مش اللبن العادي بتاعنا بتاتا) وكمان زودي كمية المياه في الأول وبعدها زودي الكثافة بالتدريج (الارشادات على العبوة) + شوفان (اللي هو كويكر) مسلوق في مياه

من 6-8 : إضافة موز مهروس + تفاح مهروس + خوخ مهروس + أفوكادو (موجود في مصر بس غالي شوية) + كوسة مهروسة + جزر مسلوق ومهروس

· ضيفي نوع فاكهة أو خضار واحد كل مره ولاحظي عملية الهضم والاخراج وكمان خلي بالك لإن فيه أنواع خضار ممكن تسبب حساسية لبعض الأطفال.

من 8-10: إضافة جبنة نستو + صفار بيض + فراخ (تضرب مع الطعام في الخلاط لسهولة البلع في الأول) + سمك (مسلوق أو مشوي وطبعا فيليه) + بروكلي (يتسلق في مياه بتغلي لفترة صغيرة والغطا مقفول بعدها يصدم في حمام ماء بالثلج)

من 10-12: إضافة خبز (من الأفضل البداية بالخبز المصنوع من القمح الأسمر (البلدي أو التوست البني)) + لحوم حمراء + مكرونة (مسلوقة وممكن تضيفي عليها خضار بيوريه كأنه صوص)

ملحوظات هامة:
في السنة الأولى ممنوع الملح: لإنه بيزود احتمالية إصابة الأطفال بضغط الدم لما يكبروا
في السنة الأولى ممنوع السكر: ممنوع استخدام السكر العادي (بتاع الشاي) مع الرضع لإنه بيعمل غازات ومشاكل ولو محتاجة تحلي حاجة ضروري يفضل استخدام عسل النحل الصافي وبكميات قليلة جدا.
في السنة الأولى ممنوع الألبان: اللبن البقري بأشكاله (كامل دسم – نص دسم – ربع دسم!)

فكرة :
الحاجة اللي كانت ومازالت بتسعفني دلوقت هي إني أطبخ لينا ولتميم مقدما.. يعني أكل تميم باعمل منه كمية وأشيل في الفريزر.. وكمان ممكن أطبخ لينا لما يكون تميم نايم لإنه لما بيصحي –وأعتقد إن كل الأمهات عارفة- مش باعرف أعمل منه حاجة! :)
--